Foot estará de xira por seis colexios galegos
Foot, a obra de Pallasos en Rebeldía que narra o camiño imposible dun equipo de fútbol palestino para clasificarse á Copa Mundial, estará neste 2022 en diversos colexios de Galicia nunha xira co apoio da Deputación da Coruña.
A rapazada de Boiro, Vedra, Ordes, Santiago de Compostela e Padrón, terá a oportunidade de gozar desta obra, que ten por obxectivo sensibilizar a mocidade sobre a realidade das persoas que viven en Palestina.
Foot está inspirada en feitos reais. É un monólogo poético, cómico e surrealista na voz dun futbolista palestino. Escrita polo dramaturgo palestino – americano Ismail Khalidi, dirixida por Iván Prado e protagonizada por Fran Rei, na natureza de FOOT está a natureza de Pallasos en Rebeldía. Isto é, sensibilizar á cidadanía desde a cultura sobre as terribles situacións que están a sufrir pobos que padecen opresión e, na medida do posible, abrir procesos de esperanza e transformación desde o país cara eses mesmos territorios en conflito, mediante accións que entenden a arte como linguaxe universal, impulsando valores sociais e políticos a través do teatro e o circo.