As Marchas pola Liberdade do Pobo saharauí, que hai un mes arrincaron desde todos os recunchos do Estado, chegarán este venres a Madrid para reclamar ao Goberno de España respecto pola legalidade internacional e os Dereitos Humanos no Sahara Occidental.

O broche final desta iniciativa será unha gala solidaria na que participarán artistas comprometidos/ as cos Dereitos Humanos como Mordo, Pedro Pastor,  Yslem Fillo do Deserto e  Aziza  Brahim.  Nadhira  Luchaa e Iván Prado, o noso portavoz, encargaranse de presentar este evento que terá lugar o sábado 19 de xuño no Auditorio UXT de Madrid.

A gala ten como obxectivo celebrar a chegada das  camiñantas á capital, pero sobre todo seguir reivindicando os dereitos do pobo saharauí. Por iso, todos os beneficios da venda de entradas irán destinadas ás familias dos/as presos/as políticos/as saharauís.

Sobre a Marcha Saharauí

A Marcha pola Liberdade nace desde a lóxica da acción directa non violenta para reivindicar e dar visibilidade á loita do pobo Saharauí e, desta forma, concienciar aos diferentes grupos políticos e, sobre todo, á cidadanía, da situación de emerxencia que vive a poboación saharauí, a cal leva máis de corenta anos buscando a paz e que se viu obrigado a exercer novamente a lexítima defensa #ante a flagrante agresión bélica das Forzas Armadas Marroquís.

Preto de 200 asociacións de todo o Estado unimos forzas para camiñar xuntas e reivindicar un Sahara Libre. Por iso o pasado 20 de maio iniciamos as marchas (co apoio de artistas como Clara Lago, Willy Toledo,  Vetusta  Morla ou Pedro Pastor) que este sábado día 19 chegarán á capital.